kontrakoa dirudien arren, palindromoek, bestelako berbek ez bezala, irakurketa bakarra dute.
ac-dc taldearen kantuek, alderantziz entzunez gero, mezu satanikoak omen zituzten, hala ikasi nuen nik.
abba taldearekin ez da hori ematen, abba palindromoa baita, eta kantuak ere simetrikoak dituzte, atzeraka entzun eta frogatu besterik ez duzue.
beraz, eta bigarren zerbeza hau lekuko, sententzia botako dut:
mezu palindromikoak egiazkoagoak dira, kontrairakurketan ez baitute kontraesanik, edonondik begiratuta, egia bera diote, egia berdaderoa beraz.
adibidez:
ONA SARRI BIRRA, SANO

lagun taldean, batek zotina.
-niri, ura edaten joaten zait, egin froga.
ezer.
-putaidearik ez daukazue, a ber… susto!
ezin.
-laga niri, honek aztikeria dirudi baina zotina kentzen du.
hor ipintzen du “aztiak” laguna buruzbehera, arnasbideak itxita.
ezta.
denak
jartzen dira begira lagun japoniarrari, ekialdeko jakituriaren
erremedio baten esperoan, eta honek, euskara garbian, palindromoa
botatzen du:
OSAKAN, ADI AZTI, ZOTINA, OKATUTA PUZKARRAK ZUPATUTAKOAN ITO ZITZAIDAN. AKASO…

ERO, LUZAZ ERRE ZAZU, LORE

Hauxe da, ongi etorri
palindromo festa
AURREKOOK ERRUA?
ATZEKOOK EZTA!

AUTORE EROTUA
lapitza da ezpata
AUTORE BEROTUA
ATARA ZARATA!

KARRATUTARRAK dira
egungo izurrite
euren zirkuluetan

ETIKA DAKITE

Ortografi akastun
zer daki ta zer ez
hurrengo kapikuak
ZEUTAKO KATUEZ?

OGIA IGO dio
simetriak hala
TA BADAKAR OGIAK
AI, GORAKADA BAT

Idazten
ari dena
nekatzen da nekez
letra-saldan barrena
ZER EZABA, ZER EZ

Bideari bira bi
bero bedi hainbat
bueltan betor beterik
TA BARE ERABAT